絲絲講場：譚木匠堅持物以罕為貴
譚木匠（00837）賣梳由兩蚊人仔起家，到依家旗下限量產品售價索價逾萬銀，可以堪稱係木梳市場嘅LV。最不可思議嘅係，公司從來都唔興大賣廣告嗰套，究竟呢個市值10幾億元嘅木梳王國有咩獨門秘技呢？
品牌獨特贏晒同業
就算譚木匠副總裁王萍同絲絲幾啱傾，佢都淨係笑笑口話呢個係商業秘密。不過，王萍就語帶雙關咁畀咗個貼士絲絲，佢話公司創業至今十幾年，每年產量唔超過千萬件，品牌獨特性明顯優勝過同業一大截。明晒明晒，即係物以罕為貴，呢個果然係千古不變嘅定律。
「做500強不如做500年」
所以唔係講笑，呢間嚟自重慶嘅上市公司，基本上已經係當地名牌，企業客戶專誠訂貨送客已屬指定動作，加上譚木匠仲識得以「情」做包裝，推動用梳送禮，就好比送愛、健康同和諧，有咩辦法唔大受「好客」嘅內地人士歡迎，而且仲有唔少品牌想同譚木匠合作覓商機，不過譚木匠老闆譚傳華一句名言「做500強不如做500年」就推掉一籮籮賺錢機會。