港交所（00388）收購倫敦金屬交易所（LME），好快就大功告成，預期下個月英國監管機構就會審批完成，套用LME行政總裁Martin Abbott嗰句，睇唔見單刁有乜問題，LME成為港交所囊中物，可以講幾乎係十拿九穩。早前獲續約3年兼加薪7.5%嘅港交所行政總裁李小加，喺港交所落實收購LME後，所謂論功行賞，照絲絲睇，唔排除佢再有人工加。
眾所周知，呢單港交所「世紀收購」，李小加勞心勞力，由頭帶到尾，由策劃、研究，到提出收購、收購策略、爭取LME股東同會員支持，以至同英國監管機構同埋內地有關方面「打招呼」，都親力親為，單係飛去倫敦，都唔知飛咗有幾多次。若果落實收購LME，獎勵吓都好順理成章。
之不過，呢單刁外界反應麻麻，覺得港交所出價太高太勇，都唔知幾耐至睇到收成；加上港交所近年不斷東征西討，大量拓展新業務，可能「使大咗」，要重整架構檢討人手安排，力有不逮嘅，就要起身講「拜拜」。再講，今年港交所業績因成交疲弱而倒退，員工平均花紅同明年加薪幅度，可能較往年為低，即係員工荷包勢縮水！若李小加今次成功收購LME後真係獲「論功行賞」，唔知會唔會有人「眼紅」呢呵？
余詩韻