Market Insight：基建股復甦可期

十八大期間，郭樹清接受訪問，直接承認A股不濟，監管機構要負上一定責任。到底把投資者看成牛頭角順嫂，要等中證監扮演「財演」去指導入市？抑或以為監管機構真係有操控股市升跌能耐？無論邊個想法都得人驚，監管機構猶如球賽上球證，按既定規則畀賽事公平進行，並不牽涉到賽果，中國股市成立二十二年，話短亦唔短，但要達到成熟市場，看來仲有遙遠路途。但言論中也看到，官方對內地股市積弱的情況愈來愈顯得着急。

中國十月份新增貸款5,052億元人民幣，是一○年十二月以來最少月份，數據限制港股反彈，加上美國總統奧巴馬大選後先選外訪，市場預期財政懸崖問題未必趕到年底前解決，基金風險胃納大減，大市主板成交比上周減少兩成一至455億元，是四星期以來最低，恒指升45點報收21,430點，只能追補上周四、五跌市的6.3%跌幅，反彈力度疲弱。

放大圖片

放大圖片

陽光油砂無謂瞓身

雞犬皆升的局面，變成消息主導，上周表示獲批到加拿大多倫多作第二上市的陽光油砂（02012），上升11.6%報3.74元，過去八個交易日升幅43%。睇番呢隻股今年三月上市，在加拿大嘅阿薩巴斯卡（Athabasca，Alberta內的一個鎮）油砂地區開採及提煉油砂的公司，招股價4.86元，查實仲潛緊水。

十年八載前開油砂嘅人唔多，主要是油價唔夠高，抵銷唔到高技術開採成本，但海嘯前油價飆升至近150美元一桶水平之後，採油砂公司立即雨後春筍般開個不停。

鐵路項目陸續提速

地質學家估算阿薩巴斯卡120萬英畝油砂礦，擁有700億桶原油儲量，陽光油砂手上三個油砂礦擁有178億桶儲量，到一六年第三個礦商業投產，日產量達到20萬桶，以油價90美元，每桶毛利30美元計，相當每年毛利21.6億美元（167.4億港元），相對目前105億港元市值，條數計落的確好誇，問到值博與否？到底地下儲量是否有估算咁多？技術上，油砂礦係咪真係能夠由目前每日一千幾百桶，去到每日20萬桶的目標？油價幾年後仲有冇90美元咁好景？都令這類股份充滿變數及不明朗，跟風炒吓無妨，長線甚至瞓身，真係要小心衡量風險。

十八大前後，基金界有多個中國投資研討會，古勝有幸同幾個基金經理閒聊，大都認為通脹已回到2%安全線樓下，加上十八大後政局塵埃落定，有利一些振興經濟政策出台。有趣是，中央講到明唔會重行「4萬億」的舊路，但大部分意見卻認為，在建材、鋼鐵等產業嚴重供應過剩之下，加快鐵路基建是相對風險細收效大，尤其比谷極都谷唔起的內需，以及中央顧忌的放寬房地產限制議題上，較為可行，同時協助消化上游產業的供求失衡。

留意了一段時間，中國中鐵（00390）及中交建（01800）兩隻鐵路基建股，由前者第三季業績，以及發改委加快審批鐵路項目，最壞時刻應已過去，一三年預期市盈率9.8倍及7倍，唔單止比○九年更低，較歷史估值中位15.3倍及13.3倍，折讓36%及47%，一旦確認行業進入復甦期，相信估值有機會回歸到近中位水平，不妨留意。

煤炭股後市添變數

近期煤炭股表現偏軟，有行業數據顯示，內地動力煤價格再度回落，而煤炭庫存亦見回升。由於預期今年寒冬為時可能較長，且溫度較低，勢必影響工業生產，從而令煤炭需求增添變數。眼見近日中國神華（01088）、兗州煤業（01171）、恒鼎實業（01393）及中煤能源（01898）均現沽壓，其中恒鼎沽壓較重，昨日跌近6%收場，宜留意若短期煤炭股股價陸續失守50日線，而未見有似樣嘅反彈，提防末季板塊反彈浪經已完結。

古勝