散戶抽翠華 博賺一成
香港人喜歡飲奶茶、食菠蘿油，加上工作忙碌，經常會幫襯茶餐廳解決三餐需要，而翠華就是不少港人熱捧的「搵食地方」。AMTD證券及財富管理業務總經理鄧聲興表示，翠華（01314）的市盈率介乎17至22倍，算是高昂，但投資者仍可趁熱鬧抽一手博一博，惟不宜長揸，建議股價升逾10%便沽貨獲利。
鄧聲興原來是翠華的長期捧場客，「我一星期幫襯翠華五次，幾乎每朝八點都會到銅鑼灣分店，叫個早餐B和熱奶茶，有時連下午茶和消夜都幫襯佢。翠華勝在地方夠乾淨，而且各間分店的食物水準一致，實屬難得，所以其價錢貴得有道理。」
新股未旺 避借孖展
恒豐證券研究部董事林家亨亦認為，由於翠華屬於茶餐廳股份，題材具有特色，可獲市場給予一定程度的炒作空間，若其新股定價介乎12至13倍市盈率，投資者不妨抽幾手作短炒，惟謹記不要借孖展，以免增加投資風險。
林家亨續指出，翠華在形象、裝修，以及食物質素方面均不俗，食物價格亦不算太昂貴，可是近期整體新股市場氣氛欠熱烈，故投資者不宜長揸任何新股，有斬獲便宜盡快沽貨。
散戶看淡 唔抽新股
翠華旭輝前景麻麻
黃先生：「呢排啲人轉去炒工商舖，遲啲舖租一定加！翠華做飲食，我就唔太樂觀。另外，內地經濟增長放緩，我諗樓價會慢慢跌番，旭輝前景麻麻。」
寧願低撈大型藍籌
禤先生：「上次我抽咗隻復星醫藥（02196）依家仲潛緊水，搞到我驚咗啲新股，寧願撈番啲大型藍籌好過，好似中國移動（00941），又穩陣又高息。」
等上市後買都未遲
嬌姐：「等啲新股上市後先買都未遲啦！依家個環境麻麻地，我鍾意買啲穩陣嘅能源股，反彈力夠強，個市跌梗都仲有得升！」