Market Insight：粵海投資水源充足

上周五公布之CPI、PPI、固定資產投資及零售數據均全部好過預期，奈何股市被美國「財政懸崖」拖後腿，但對長線投資者而言，可能是低吸的好機會。美股及港股ADR回穩，今日港股有機會略為反彈，但除美國「財政懸崖」外，希臘又呻窮又再伸手攞錢，不過今次歐盟冇咁順攤，似乎等西班牙求援之後或會放棄希臘，歐美短期不穩將限制港股升勢。

奧巴馬亦要出口術為「財政懸崖」降溫，但死結係向富人減稅議題各不相讓。對於「財政懸崖」發生機會，最悲觀論者亦認為最多係三分一，標普預料有15%機會「墮崖」；但對有錢佬來講，一成風險也嫌過高，有乜依郁即走去債市避險。

放大圖片

放大圖片

貨幣政策料放寬

港股陪美股「跳崖」，而且係笨豬跳，恒指上周五再跌182點，插穿上月底低位，仲一口氣殺入牛仔重貨區，下個支持位要睇21,000點關口。不過，國企指數走勢冇咁差，低位有反彈，而且收陽燭。所以港股跌勢主要目的係殺牛，上周五主板成交縮至576億元，期指則低水70點。

內地CPI再降至1.7%，主要係糧食跌價，今年係中國連續第九個「豐收年」，所以美國穀物失收亦影響不大。PPI則有反彈，低通脹造就有進一步放鬆貨幣政策空間，但分析員普遍認為年底前減息或減RRR機會不大。政府換屆惹憧憬並非代表新領導人能力高強，而係好多政策留給新政府去領功。

聯想（00992）業績大翻身，股價逆市升5.7%至接近7元大關，投資者現在關注點已非公司成為全球PC一哥，而係佢嘅智能手機業務發展成點。原來聯想已成為祖國電話二哥，銷量僅次於三星，但仍要蝕緊錢，主要係手機採取PC相同策略，以低價爭勝。

跌市發揮抗跌力

搶佔市場之後下一步自然係搵錢，所以大行睇好手機成為未來增長動力，但悲觀睇法係內地手機市場競爭激烈，唔計國際品牌，國產手機大廠牌子可能十隻手指數唔晒，未來毛利率上升空間有限。上星期多隻香爐多隻鬼，「大可樂」以999蚊人仔5吋大屏幕搶攤，擺明爭睇視頻同打機客。

近期有關「港獨」的熱門話題是「香港人飲甚麼水？」不需讀過通識科亦知是「東江水」，所以全港市民都要幫襯粵海投資（00270）。該股已成為公用股，而公用股特性通常是大升市時表現較沉靜，但到跌市時則發揮其抗跌功能。粵投更為可愛，早前隨大市升至6.5元新高，上周五稍跌破6元即告反彈，收報6.19元。

如果當粵投係公用股，集團預測PE約12倍幾，明顯較2、3、6號仔便宜，較差的是預測周息率有約三厘，不及兩電及領匯（00823）。集團除供水之外，亦有物業投資、百貨、發電、酒店及公路等業務，雖然加埋都唔夠「東江水」咁值錢，不過勝在項項業務算穩健。

近期個市嘅「恐慌指數」又開始攀升，資金可能由高風險股票回流低風險，上周五見穩陣內需股如康師傅（00322）、華創（00291）、恒安國際（01044）明顯回春，粵投進可攻、退可守，暫時回歸避風港先。

內房銷售撐股價

上個禮拜內房股氣氛唔係差，事關唔少公布已實現甚而係超過今年所定嘅銷售目標，消息支持越秀地產（00123）股價創五十二周高，另見恒大地產（03333）走勢亦唔錯，上周五恒指跌百幾點收場，但恒大股價仍能逆市上升，最後收報3.85元，升1.3%。

古勝相信，嚟緊中央未必咁快會放鬆內房調控，但相信再大幅收緊嘅機會好微，內房板塊嘅政策風險已見頂，嚟緊股價表現取決於銷售成績及資金周轉速度。選股方面，恒大較啱炒家胃口，中長線持有則建議選行業龍頭嘅中國海外（00688）同華潤置地（01109）。

古勝