自從政府出狠招打壓外地人買樓同短炒之後，樓市普遍都只係交投淡靜，樓價反而就冇出現明顯調整。Prof. J對呢個現象並唔覺得出奇，由始至終都相信政府出招並唔係為咗推冧樓市，反而只係希望冷卻樓市升幅。
政府正努力從根本入手，近排致力增加土地供應，但始終一幢大廈興建，需要兩三年時間。呢段非常時期，只能用非常手段去遏止樓價升幅。但面對環球低息環境，加上有利人口趨勢，足以抵銷政府壓抑樓市等新措施帶來負面影響。樓價沒有出現太大調整，反而有利地產股繼續做好。
有大行報告話，香港未來家庭組成速度比最近幾年住房完成步伐大大超前，加上市場預期超低利率環境將持續，只會令更多準買家提早置業，令樓價有支持、甚至上漲壓力。現時雖然香港土地供應仍然緊張，但大型發展商手上土儲充足水平將可持續，所以Prof. J較睇好具強大銷售渠道及更好資產周轉發展商，因有助推動自身資產淨值。
芸芸本港地產股中，Prof. J繼續睇好龍頭股，如新地（00016）、長實（00001）、新世界發展（00017）同信置（00083）。雖然土地不斷成交、中標，但售樓速度仍掌握喺佢哋手上，政府現階段亦只能有限度做嘢。在商言商，一眾龍頭公司都知道應該如何取得平衡。繼續追蹤，出發！
香港大學電子金融服務榮譽助理教授 徐燦傑