絲絲講場:大孖沙御用經紀眼光準

「股壇長毛」David Webb又玩踢爆,今次嘅猛料係會德豐(00020)或吳光正家族,疑似揸住成兩個巴仙嘅新地(00016)股票,依家嘅價值大嗱嗱60億。絲絲一心要求證,終於挖到,原來Corrington係由吳光正家族擁有,同會德豐無關。

咁Webb呢單料點嚟?話說Webb網站一直有分析開聯交所中央結算系統嘅參與者同交易資料,近日就發現有間叫做Corrington嘅證券公司,地址係會德豐大廈。

Corrington持倉夠「堅」

Webb網站派代表試吓喺呢間行開戶,點知就食檸檬,人哋話唔接受街客咁話!所以Webb就推測,呢間行應該係吳光正家族嘅御用經紀。

呢間行聽落名不見經傳,但睇吓份持股清單就唔講得笑,佢揸得最多嘅係兩個巴仙新地股份,市價成60億;其次揸得最多嘅係九倉(00004),就冇咁意外嘞!佢仲揸住唔少內房同埋零售股,好似遠地(03377)、龍湖(00960)、綠城(03900)、普拉達(01913)咁,連長實(00001)佢都有捧場呢!

有投資界朋友同絲絲講,其實好多大孖沙都有御用經紀。睇番間行嘅往績,應該都係靠投資賺錢。朋友就講,見到佢喺今年三月二十六同埋二十七兩日,淨沽出好多新地股份,但新地捲入廉政風暴,佢就喺當月三十號股價大跌嗰日,大手掃入新地,買賣時機好準喎!

呢幾個月就見佢買番好多新地股份嘞!絲絲就諗,睇住間行嘅買賣手影,就當跟吳生學投資啦!