新時代能源（00166）貴為彤叔愛股，彤叔旗下嘅周大福代理人公司上個月再增持，持股量依家已達30.92%。
喺新時代打骰嘅鄭家子孫自然不敢怠慢，聽聞該公司主席鄭錦超同埋CEO鄭明傑兩叔姪，最近用誠意成功打動咗兩位權威嘅石油業專家，做佢哋嘅軍師。
鄭錦超同鄭明傑搵呢兩位猛人返嚟一啲都唔容易，唔係有錢就得，直頭可以媲美劉備三顧草廬，幾個月內到北京親自拜訪不下10次，向佢哋解釋公司前景、發展計劃等等，用十足誠意畀足面先可以令佢地點頭，擔任新時代嘅石油及天然氣顧問委員會委員。究竟呢兩位過江龍有咩咁把炮呢？
其中一位係71歲嘅羅英俊，佢九九年就被任命為中石油（00857）嘅副總裁，主要負責勘探同生產，曾經參加過南美地區、中亞哈薩克等地嘅海外石油勘探項目。另一位49歲嘅董秀成博士，係現任中國石油大學中國油氣產業發展研究中心主任，仲幫國家好多大型石油公司提供戰略同政策諮詢。
講返轉頭，新時代CEO鄭明傑係彤叔嘅姪孫，只得38歲，年輕有為。佢喺加拿大阿爾伯塔大學（University of Alberta）讀商學，浸完鹹水返嚟之後，喺新世界（00017）做過唔同職位，之後先轉去做採礦業，依家就喺新時代跟uncle鄭錦超學嘢。絲絲仲八到，傑少唔似得一般富二代咁鍾意享樂，佢嘅工作態度好認真，仲每日八點幾一定準時返到公司開工做嘢添。
余詩韻