絲絲講場：中銀曾錦燕私銀揸旗
每逢有國債發行、iBond推出嘅時候，大家打開報章，唔難搵到佢嘅意見，究竟佢係邊位？之唔係無見一排嘅中銀香港（02388）前度全球市場副總經理曾錦燕（Wendy），佢依家已經成為中銀香港嘅私人銀行主管，做咗私銀一姐，絲絲真係要借機會恭賀佢啦！
尋日中銀香港宣布推出私人銀行，Wendy親自上陣介紹私銀業務，佢哋嘅口號係「穩中融動」，意思即係「穩固、中庸、融合、靈活應變」，又幾有心思喎！
絲絲原本以為，中資銀行嘅分行設計都會比較傳統，原來唔係o架，Wendy就講解話，佢嘅私人銀行中心室內設計，用咗富有時代感嘅設計理念，仲請咗本地當代藝術家參與設計添。
私銀中心「一間夠晒數」
目前中銀只有一間私銀中心，Wendy話如果客戶有需要，客戶經理可以到唔同地點提供服務，所以分行數目唔使咁多，又真係幾方便嘅，唔怪之得「一間就夠晒數」啦！