外界所知內地人民嘅財富狀況，可能只係停留喺每年公布唔同嘅富豪榜，一個二個超級富豪嘅身家，上網一查就查到，但一般平民百姓嘅資產流動，就神秘得多。
絲絲最近睇到，成都高級學府西南財經大學今年公布嘅全國首份《中國家庭金融調查報告》，呢個調查研究歷時3年，涵蓋咗25個省，訪問咗超過8,400戶內地家庭嘅財政狀況，得出嘅結果發現，原來整體財富當中絕大部分，就只係揸喺一成最有錢嘅人手上，亦即係話貧富懸殊得好緊要！呢個研究足以睇到，中國經濟起飛外表風光嘅同時，實際上仍有好多貧苦大眾捱緊！
外國一直以為內地人民嘅資產分布得叫做幾平均，但係呢項研究嘅牽頭人甘犁教授就話，研究顯示出財富分布嘅傾斜程度，比我哋一般所諗嘅嚴重得多！研究發現，財富主要集中喺收入最高嘅10%家庭，呢10%家庭就揸住咗86.7%嘅總財富、仲佔咗74.9%嘅總儲蓄、同57%嘅可支配實際收入。
里昂有分析師睇完個報告話，點解中國嘅儲蓄率持續高企，其中一個原因可能就係財富分布嚴重不均，佢話內地嘅窮困家庭根本唔夠錢去消費，反而西方國家，有錢嗰啲一早就使晒。絲絲認為，趁住開「十八大」，領導人認真要諗諗計，解決咁嚴重嘅貧富懸殊問題！