絲絲講場：雅虎靚媽盡展生殺權
雅虎嘅新任行政總裁邁耶（Marissa Mayer），早前剛剛post咗一張佢同啱啱出世嘅小寶寶嘅合照，邁耶手抱住一個超可愛嘅BB仔，絲絲都替呢位靚媽高興。之不過，邁耶好快就要收拾歡樂嘅心情，去完成一件佢唔係幾想做、但又必須要佢做嘅事：就係要執行雅虎嘅大瘦身行動，喺全球超過1萬8千個正職同埋臨時工之中，炒1萬人！
生完BB 部署大裁員
根據科技博客《Business Insider》引述接近雅虎消息人士話，邁耶已經預咗「（裁員嘅事）等我嚟（郁手）」。消息人士又話，邁耶唔會一刀切裁員，而係會好謹慎好小心咁嚟搞，因為關乎員工嘅士氣，亦關乎佢呢位啱啱上任無耐、一直得到市場高度評價嘅女CEO嘅個人聲望。
邁耶今年七月先至由Google轉去雅虎做，經佢一番努力，已將Google備受業界讚揚嘅親民作風帶入雅虎，雖然只得嗰3個月，雅虎嘅員工已開始接受呢位靚女CEO。邁耶啱啱喺十月先誕下麟兒，轉個頭就即時要做劊子手，你都咪話易啃！
識搞手機Apps可留低
為咗減低大裁員打擊雅虎員工士氣，邁耶嘅裁員行動早就唔覺唔覺咁開始咗，好似喺上個月先靜靜裁減咗韓國部門200個員工，照睇雅虎手機博客業務相信都好快會消失。邁耶喺早前雅虎第三季度業績會時，已放過風會大裁員，佢仲暗示咗想雅虎有一半研發人員都係做手機方面嘅研發，睇嚟唔想畀人炒，就要學吓點開發手機Apps囉！
余詩韻