唔知大家仲記唔記得，前幾年美國可口可樂公司曾經想以24億美元收購內地果汁大王匯源果汁（01886），但最終無功而還？
絲絲就好記得喇，因為當時如果收購成功，除咗係外資公司歷史上規模最大嘅一次收購中資企業行動外，更係標誌住中美兩大民族品牌嘅結合，幾咁震撼！
彭博網當年就曾經報道過，喺收購嘅過程中曾經有中國黑客入侵可樂公司嘅機密系統中，但可樂公司就一直都無回應過呢個攻擊行動。
據稱，當年有黑客偽裝成可樂公司嘅CEO，將一封帶有病毒鏈接嘅電郵，寄畀可樂公司嘅亞太區副主席，之後黑客就裝咗鍵盤紀錄器，偷咗好多密碼同電郵，令佢哋睇到公司嘅內部行政文件。呢班黑客仲神不知鬼不覺咁足足盜取咗一個月機密，真係好得人驚﹗不過當事人可樂公司至今都無公開講過自己曾經受攻擊，擔心影響股價同令聲譽受損喎﹗
之但係彭博網再次為事件解密，話睇到可樂嘅內部文件，指黑客係受到中國政府支持，所以喺受黑客攻擊嘅第三日就決定取消收購匯源。