中國油企想喺全世界開採資源，之不過依家好多國家都話要保護自己嘅資源，中國油企「走出去」諸多政治阻滯，睇吓中海油（00883）近日想收購加拿大嘅Nexen就知啦！於是乎中石化（00386）嘅母公司中石化集團就諗到計仔開拓市場，就係搞工程嘞！話說中石化喺美國懷俄明州一個人口唔足三百人嘅小鎮，幫一個煤轉油項目做工程建設。當班老外睇到中石化搞工程咁有成本優勢，日後睇怕會爭住搵幫手，都咪話唔係一條大財路！
呢個項目係由一間侯斯頓嘅能源公司擁有，今次簽咗中石化負責施工，合約價值就冇披露嘞，但就傳過呢個項目成本要成20億美元，所以唔好以為係細項目啊！中石化同傳媒講，依家煉油同化工嘅投資程度好高，對有意打響工程品牌嘅中石化嚟講，嚟緊幾年喺海外都會有好多機會。
中國企業最大嘅優勢，就係成本優勢嘞，據講呢個美國煤轉油工程，中石化會用上價錢相宜嘅中國零件同物料。
講開又講，依家能源行業咁多新發展，好似美國頁岩氣革命搞到天然氣產量大增，嚟緊對工程嘅需求都咪話唔大，一旦中石化喺工程呢瓣打響名堂，對「中國製造」嘅品牌效應梗係有幫助啦！