最近有唔少內地知名企業家都傳出婚變消息，對佢哋嘅太太嚟講當然係壞消息，但係對內地一眾保險界人士可以話係喜訊！ 因為內地嘅婚姻保險一時間火紅起來！而且仲因應呢次名人婚外情，俗稱小三嘅新聞影響，婚姻保險更畀內地網民惡搞，改名為「防小三險」。
其實婚姻保險已經喺內地興起多時，好似陽光人壽啱啱推出嘅「愛你一生保障計劃」，就規定計劃只能夠由丈夫投保、妻子做受益人。兩公婆投保前仲要傾好保單嘅權益劃分比例，比例最低由六成起跳，表示將來妻子有權享有保單最少六成嘅權益。
有見近日內地富豪接連被傳有小三，於是近日有網民講笑，話呢個計劃要改名做「防小三險」，因為老婆一定可以分到多啲錢，老公先唔會咁笨出去找小三喎。
生命人壽推出嘅「紅玫瑰」計劃亦規定，保單所有分紅、現金價值等全歸女方所有，實行為女性設下安全網，令到佢哋唔使擔心婚變後嘅經濟狀況。
不過就有保險業人士話所謂婚姻保險只係由傳統保險產品組成，再用「婚姻」包裝推銷，其實一啲新意都無。絲絲覺得，網民咁有諗頭，以後婚姻保正名為「防小三險」，睇怕好sell得多，而我哋姊妹們，不妨都叫老公買番一份，叫做多個保障。