港交所（00388）今日（七日）除咗公布第三季業績外，中午時分仲有一項幾特別嘅活動，事關城中一班女商業領袖會出席港交所嘅中午開市儀式。絲絲記憶所及，今次應該係首次由「全女班」主持開市儀式，而負責今次「創舉」嘅就包括財經事務及庫務局副局長梁鳳儀、積金局主席胡紅玉等。
話說今次咁特別嘅 「全女班」開市儀式，係由專門推廣女性做董事嘅國際組織Corporate Women Directors International（CWDI）主辦，將會邀請全城九名喺各行各業都有出色成就嘅女性領袖出席。
港交所早前發表諮詢文件，建議上市公司董事局要多元化，廣納有唔同經驗同背景嘅董事，令到董事局更全面。唔講唔知，澳洲交易所較早前也推行相關政策，結果令到女性董事嘅比例由一○年嘅8.3%，增加至一二年嘅15.1%。
根據港交所嘅數據，依家恒指成分股，女性董事嘅比例只有9%，換言之，增加女性董事比例仍然有好大空間。
CWDI早前已經喺納斯達克、加拿大、南非、土耳其、同西班牙等交易所主持「全女班」敲鐘開市儀式，藉以引起公眾關注，推廣更多女性做董事。
余詩韻