股壇同樂壇雖然差之千里，但實情唔少娛樂圈人士都好like涉足股壇，例子就有中國3D數碼（08078）、橙天嘉禾（01132）等，尋日再多咗間，咪就係黃栢鳴嘅天馬娛樂（08039）囉！絲絲一心想見吓畀人包咗……拍九部戲嘅古仔，所以晨咁早去咗上市儀式，雖然最終撲個空，但就有幸識咗黃子桓。
黃子桓哩個名既熟悉又陌生，但一講到兩集《葉問》、《龍虎門》等為人熟悉嘅港產片，大家就會：哦！咪就係呢幾套戲個編劇囉，而且佢仲係黃栢鳴個仔，依家拍緊嗰套《忠烈楊家將》都係佢嘅大作，絲絲就好奇問佢係咪特別鍾情動作武打片，點知佢同絲絲講，一個好編劇要乜戲種嘅劇本都識寫至得，所以嚟緊會乜類型都會試吓，無獨有偶，黃栢鳴亦都話嚟緊會拍多啲唔同類型嘅戲，果然係兩父子！
喺老竇間公司做咗8年嘅黃子桓，雖然唔係第一次見傳媒，但就係第一次去上市儀式，佢都話又興奮又緊張。
佢老竇今次係重返股壇，早喺○一年就將東方娛樂（00009，現稱東方實業）上市，之後賣盤成立天馬娛樂，聽講呢個名嘅寓意係取其「天馬行空」嘅意思，一來希望個仔寫劇本都創意十足，二來係黃子桓生肖屬馬喎。絲絲都好希望佢繼續發揮小宇宙，為港產片爭光！