絲絲講場:葉志禮28年前揼骨起家

絲絲放假嘅時候鍾意「畀人揼」!唔好誤會,係揼骨嘅揼。

豪特保健(06880)CEO葉志禮話28年前就已經發現香港人呢個特性,咁就創起業來,當年仲係自己攞住支手提按摩棒,四圍去sell客。

親力親為搞大OTO

葉志禮睇到香港人工作同生活壓力咁大,呢類產品一定有市場。時至今日,市場出現咗好多唔同品牌,可想而知市場競爭有幾大。佢依家每個星期都會巡舖,為免啲員工認出,就離好遠咁望過去,有時亦會委託朋友去試用產品,畀吓意見咁。

佢喺28年前創出呢門生意,由一支手提按摩棒同專櫃起家。葉生話自己本身都係一個Sales,喺公司發展嘅頭十年,佢都坐鎮門市,可以直接咁了解到市場變化同顧客行為,到咗後期公司開始有規模,自己先退居幕後。

葉生講,初頭佢哋由日本啲工廠引入按摩產品,由一支手提按摩棒做到成功之後,再到腳部產品,一直去到九五年,佢哋先開始用「OTO」呢個品牌推出產品。原來「OTO」個名都好有意思,日文係美好咁解,而個Logo代表平衡,希望大家「Work Hard, Play Hard」咁,完全符合佢哋個宗旨。

余詩韻