Market Insight：內房龍頭 保持強勢

美企購併消息，港匯一度升穿7.75強方兌換保證，金管局連續兩日入市承接美元沽盤，配合港股收市前，歐洲經濟火車頭德國，公布九月零售銷售按月升1.5%，幾乎是坊間估計0.3%嘅五倍，港股昨日高開後，收市一段愈挾愈有，經過三日整固的恒指，一日之內反彈213點報21,641點，美中不足是主板成交仲未算旺，得479億元較上日僅多出19億元。

股海尋寶熱仲未完

總結十月股災月，恒指唔單止唔使跌，有801點進帳，中共十八大及美國總統選舉在即，原先計劃十一月第一個禮拜開始鳴金收兵，分批沽貨套利，不過由近日親身感受到，認識的賓架把口雖然開始轉軚信內地經濟第四季會初見轉機，但手底裏買夠貨嘅卻少之又少，落後及高beta尋寶熱應該未玩完，短炒繼續留意番水泥、消費及鐵路基建股。

放大圖片

放大圖片

事實上，內地水泥價格由八月低位至今累積兩至三成升幅，尤其東部及華南一帶，產能增長也由八月開始加快，穩陣的可以留意華潤水泥（01313），賭博味道重啲可以睇台泥國際（01136）。

政府推出SSD及BSD兩招後急跌的地產股，昨統統見反彈，五大地產商今浪並未達到古勝估計的一成調整目標，出招唔夠辣？抑或今日投資者實在太精明？看來兩個原因各佔一半。

內房融資成本下降

美銀美林報告話相比起新加坡，聯匯令港元失去與資產價格自然的調節功能，而且新加坡供應相比人口比例，遠高於香港，相信短線調整後，香港樓價長線仲係要睇好，平均有42%資產淨值折讓的地產股仲係好吸引，值得逢低收集。

內地樓市經過七、八月一輪衝鋒，傳統「金九銀十」唔旺通街眼鏡碎。數據顯示直到上周日，內地54個城市成交21.2萬套房，比九月同期跌6.4%，創半年新低，幾隻龍頭內房股未受影響，君可見華潤置地（01109）以及中國海外（00688）股價距離52周高位只不過1到2%，主因是對比其他對手，首三季兩者已完成全年售樓目標八成，埋單計數超額機會頗高，反而睇餸食飯，準備九、十月大賣的對手隨時要調低全年目標，相對弱勢，近期彈唔起的雅居樂（03383），頭九個月完成目標59%，能否到岸還仲係未知之數也。

除此之外，近日熱錢持續湧向高息企業債，昨日有內房公司發5年期公司債居然只係6厘水平，半年前諗都無諗過！儘管樓市短期展望一般，融資成本咁低，對重債內房點都有幫助。

估計內房股已反映未來幾個月不抱厚望的銷售數據，入市值博率應該高於坐艇風險。如果嫌上述兩隻龍頭太重磅，冷門心水係保利系的保利置業（00119），其首三季完成銷售172億元（人民幣•下同），已超越全年預測的160億元，公司上調目標去到190億元，超標機會仲係好高。過去其高負債比率（六月時1.15倍），令折讓高於同業平均，刻下情況應該相對有利，若短期升穿七月阻位4.88元（港元•下同），有機會有較大突破出現。

信義有條件追落後

昨日唔少板塊都蠢蠢欲動，好似啲燈飾股，見雷士照明（02222）、達進東方照明（00515）、真明麗（01868）升幅介乎5至9%；電池股中聚電池（00729）同理士（00842）分別升6%及7%，睇吓實力股天能（00819）同超威（00951）幾時開車。另外，玻璃股中，中國玻璃（03300）昨日再發力，以全日高位1.08元收市，升幅8%，相對而言，信義玻璃（00868）只係升得0.23%，若然短線隻中國玻璃破位而上，信義亦有條件追落後！

古勝