絲絲講場：康師傅反擊唱衰唔罷休
最近中日兩國因為釣魚島主權爭議，反日情緒高漲之際，坊間竟然瘋傳康師傅（00322）有「日系血統」嘅文章，搞到康師傅生意大受打擊。
事緣有內地報章爆料，近月內地有「抵制日貨康師傅」嘅行動廣泛喺網上散播，話康師傅八成半股份係由日資持有咁話。事件仲提到康師傅某大對手係最大嫌疑添！
難避免同外資合作
絲絲特登搵咗康師傅負責人問清楚，財務長林清棠回覆話，件事九月已經開始，公司已經向內地工商部門舉報，證實呢啲行為係屬於「不正當競爭」，之但係就嚟「十八大」，中央要維穩，所以叫佢哋唔好嘈，佢亦承認事件對康師傅嘅銷售帶嚟全國性影響，重災區係華中地區，但只係有一啲影響喎。不過佢亦提到，其實業務愈做愈大，總避免唔到同外資合作，所以亦唔會停止同外資嘅合作。
單嘢實情係點，絲絲唔敢妄下判斷，但淨係鬥業績同生意額咪好囉！
余詩韻