絲絲講場：許照中逆市玩大啲
股市沉悶，散戶早已意興闌珊，但金魚缸仍有大好友。好似六福金融主席兼行政總裁許照中，喺股市打滾多年，經歷無數風浪，今次市況低迷雖然比佢想像中長，但仍然覺得「股市有得玩」，故扒逆水將經紀行擴充，辦公室面積加大四千多呎。
擴充總部 增添分行
雖然許照中對股市仍有憧憬，但佢有一套理論。佢認為個股市雖有得玩，但唔等於你一定有得玩或者有能力等到個市轉勢，所以佢要行先一步，喺淡市中搞擴充。
六福金融總部依家大約六千幾呎，佢決定再擴充多四千幾呎，即加埋成萬呎咁多。
股市循環 落完會上
公司團隊人數亦已增至一百人。繼深水埗後，最近又喺荃灣開分行。加上公司又喺廣州、上海等建辦事處，可謂動作多多。佢話市淡有時間可以建立全面嘅經紀行平台，市旺反而冇時間！
過往每次轉換工作都遇上股市低潮嘅許照中，估個市大約半年就好轉，佢坦言今次「失咗預算」，個市半年都未有起色。
但係佢就相信股市係有循環嘅，有上有落。今次市差雖然係長咗啲，但認為點都唔夠七三年股災，持續咗一兩年咁差啩！果然係股市大好友。
余詩韻