內地保險市場係發展中市場，所謂「樹大有枯枝」，違規事件少不免喇，中國保監會淨係今年，已經派出162張「牛肉乾」，其中有成20張係開畀內險業龍頭大哥國壽（02628），睇嚟國壽唔單止要面對今年第三季度蝕錢嘅危機，仲要好好檢討一吓點解會有咁多罰單。
保險公司中介業務違規違法行為普遍，中保監早前喺一份研究報告直指，呢個係保險市場秩序混亂嘅根源，其中較為普遍、嚴重嘅問題係業務弄虛作假，明明係直接業務，就講成係中介業務，大有「掛羊頭賣狗肉」嘅味道。
據講，162張機構罰單當中，約有三分之一涉及虛列、虛報、虛掛保險中介業務，即係將直接業務轉至保險中介機構套取資金，或者係基層公司直接虛構營銷員嚟套取費用等，總之就係「造假」啦！