孖妹S檔案：經濟達人投資唔講得笑？

香港人從來都善於笑看風雲，即使「股市」崩於前也臉無懼色。何解呢？因為港人懂得自嘲，嘩嘩哈哈地笑走股市上的怨氣。即使近日股市風高浪急，但Alex認為港人不妨以輕鬆態度待之，才能逮到賺錢機會，「我冇見過一個緊張兮兮望住股市的人能夠發達！」不過，自己的血汗錢，唔多唔少都會緊張o架嘛，就看看Alex這位口才了得的經濟達人怎樣「笑」看金融前景！

林：擎天教育創辦人林德財（Alex）

彩兒：聽講你教投資的方式相當搞笑抵死喎！

林：即使投資都可用輕鬆有趣的角度出發，唔係吓吓都要死咕咕咁(目及)住個市，這樣通常都賺唔到大錢，反而啲人愛理不理，回過頭來就能獲得唔錯嘅回報！其實，在股市上賺取10%的回報不難，問題是如何連續十星期也能獲得10%的升幅，確實考起不少炒家呀！所以呢，要喺市場上分一杯羹的話，最重要的是捕捉明顯升浪！

高妹：但係我炒咗幾年股票，都唔見有明顯升浪！

林：自○八年過後，恒指約在18,000點至24,000點徘徊，散戶要賺大錢真係難過登天，但現時樓市暢旺，遲早會利好股市，大家可耐心等待港股的升浪，明年下半年或者能夠升穿25,000點添呀！

彩兒：嘩，25,000點？咁咪仲有成4,000點的升幅？

林：係呀，因為股民的投資情緒壓抑已久，一旦釋放出來的話，將是不可多得的動力呀！如果恒指突破25,000點，我會買入與恒指相關的認購證炒吓市場的投資氣氛。講真，依家可以買咩實股呀？本港經濟前景荊棘滿途，除咗老闆們大嘆生意難做，打工仔亦嗟怨人工跟唔上通脹，企業的盈利能力未見樂觀。不過，幸好股價的升跌未必由實業帶動，市場的投資情緒亦是其中一個主宰股價的因素呀！

高妹：黃子華曾經講過一條股票方程式：「升，唔放。跌，唔放。」你又點睇？

林：投資者要喺股場上獲利，大部分都要經過「Buy and hold」（買入及持有）的階段，當中不少實業股更要hold一至兩年以上才能獲利。然而，我曾於九七年買過認沽證而賺到十多萬，所以我對窩輪尤有情意結，金融場上的投資均以窩輪為主。之但係，炒股炒輪等操作美其名係投資，實際卻與賭博的性質類同，總有贏有輸，所以我一年僅入市兩至三次，以減低輸錢的機會！

彩兒：港人除咗鍾意炒股之外，同樣鍾意炒樓！

林：呢個係傳統智慧嘛，我哋總覺得持有磚頭始終較為穩陣，但依家啲樓價升唔停，港人已經去到要用三、四百萬去供一個僅有三、四百呎嘅「豆腐膶」單位。縱使樓市投資已喪失理智，但我估計樓價仲有幾年的升值空間，因低息環境將會維持一段長時間，加上市場的實際需求仍存，樓價尚會繼續破頂！不過，樓價愈推愈高的同時，買樓風險亦相對增加，所以我並未打算高追物業呀！

迷你棟篤笑的語言智慧

金融市場滿堆數字，要說得有趣甚至搞搞爛gag，其實不易。Alex認為好笑的笑話係要有深度，好讓大家有反思空間，「不少創作都係源自生活，我哋只要細心留意，便不難從中取材度橋。」儘管經濟金融屬嚴肅專業的範疇，當中又涉及不少難解的金融用語，但他表示股票投資等課題與民生息息相關，故此不難取得觀眾的共鳴。

不過，若然Talk show期間出現冷場，又可怎樣應付？他稱，表演者要懂得控制現場氣氛，亦要有兩手準備，盡量避免在笑位中間出現停頓位，便可hold住個場。即使Alex是Talk show初哥，但多年來開設經濟科補習班及投資訓練班，其風趣、抵死的教學方法，仍為學生所回味。今次更特登與三位金融學系大學生分享與投資有關的gag，諷刺現時的投資氣氛！以下是當中三個gag的金句：

1）你與其鬧人快點死，倒不如咁講：「祝你投資大有斬獲……喺人壽保險方面！」

中大工商管理學系一年級阿康：

真係Okay喎，唔少港人都有買投資相連保險，實唔會對呢個gag陌生啦，而且我哋平日仲可以用番呢句去「祝福」別人，可謂活學活用！

2）當時正值雷曼倒閉一役，我正在銀行門口睇股價，突然聽到旁邊的太太大罵：「雷曼兄弟！邊個阿媽生o架？咁樣嚟害人！」我心諗：「我唔知道佢哋個阿媽係邊個，但肯定係一個心理變態嘅阿媽，日日走去嚇雷曼兩兄弟，句句都『I kill you later』，最終市場仲出現埋Accumulator（累計期權）嚟害人！」

中大計量金融及風險管理學系二年級Shing：

普遍來說，財經總是畀人正經專業的感覺，唔少市民對Accumlator等投資工具一啲都唔熟悉，但如果輕鬆搞笑咁講出嚟，起碼可以引起大家嘅興趣去了解各種衍生工具的特性，先可以減低投資風險。

3）窩輪同女生一樣，有點曲線是好的！

浸大財務系三年級Peter：

好有創意呀！坊間有唔少抽水話題，但我較少聽到投資嘅抽水笑料！雖然我大多留意正股走勢，較少涉足高風險的衍生工具，但都知道波幅對窩輪的重要性，哈哈！

林德財小檔案

年齡：42歲

學歷：香港大學社會科學學士及碩士，主修經濟學

履歷：於九二年開辦補習社教授高考經濟科，及後於○○年開設投資興趣班，以風趣幽默形式去講解各種衍生工具的投資操作心得，尤以窩輪炒賣為主。

興趣：閱讀

高妹、彩兒

若有料報畀高妹同彩兒或有嘢問，可電郵money.biz@opg.com.hk