去到第四季，好多財金界都積極準備年結，絲絲見到有啲界別甚至已經派定成績表，《Finance Asia》最新選出咗本地貨幣最佳定息分析師，結果由東方匯理高級策略師張淑嫻（Frances）冧莊拎第一。
做得第一，梗係要花好多時間喺工作上，少不免又會犧牲咗啲私人時間喇。
Frances話，每次出trip完成工作之後，都會好掛住屋企一對囝囝，歸心似箭，佢仲話一對囝囝都成日好掛住佢，就算佢唔使飛，返工前都會畀囝囝問夜晚會唔會返屋企，真係夠晒sweet。
Frances成日都要四圍飛見投資者，佢同絲絲講，唔同客戶要求真係好唔同，一般公司客就對貨幣同利率對沖有興趣，想知大方向，對沖基金就短線同長線嘅分析都通殺，而央行同主權基金就對經濟、債市同新興貨幣最有興趣。
東方匯理喺今次選舉入面可以話獨佔鰲頭，因為Frances得票率高達39%，連第2位都係佢同事Dariusz Kowalezyk，兩個加埋搶咗超過六成票！