經歷幾許風雨嘅思捷（00330）出咗新年報，絲絲發現佢成本年報嘅包裝，係用番舊年十一月投資者日報告嘅色調，都畀到人舒服自然嘅感覺，不過睇到入面佔咗大堆篇幅講述董事辭任，同埋董事購股權（option）失效，都不禁唏噓。
思捷年報有成十幾頁講董事option，當中佔最大篇幅係前財務董事周福安，有成7頁列出原來佢收到咁多option，可惜差唔多全部失效，行使價有高有低，有啲去到成119蚊，就算係「平」嗰啲，都高過現價！搞到周生今年五月辭任前都無機會行使。
思捷尋日收報12.46元，52周高低位8.32至19.78元，回想起嗰段大起大落日子都咪話唔得人驚。
為咗留人，思捷一二年最高薪五位高層合共逗咗近7,000萬元人工，比一一年多咗九百幾萬，而臨危受命撐起思捷嘅主席兼非執董柯清輝，人工梗係要加，由一一年嘅73萬元加到80.5萬元，但當然遠比唔上九月底走嘅前行政總裁范德施，佢人工收咗1,632萬元，但加埋option同花紅實際有超過5,381萬元袋袋平安。至於九月底返工嘅新CEO馬浩思，早前嘅公布已披露佢嘅年薪係150萬歐元，酌情花紅150萬歐元，其中首兩年為保證花紅。
講番本年報，內容第一頁嘅標語《我是女人，不是女孩...》，似乎主打「中女」市場，行舒服自然格調，思捷到今年十一月會有新一年投資者日，到時唔知有咩轉變呢？