絲絲講場：四叔坐艇望家鄉尚差3成
人稱「四叔」嘅李兆基，上市公司旗艦係恒基地產（00012），私人投資旗艦就係兆基財經，揸咗好多股票同埋其他投資，過去幾年四叔好慷慨同大家分享投資心得。佢前日話唔退休住，要賺返蝕咗嗰啲先，咁即係幾多呀？四叔尋日揭開謎底，原來要追返三成喎。
教借孖展炒地產股
「四叔」話旗下嘅兆基財經喺○八年金融海嘯期間蝕咗近半，不過今年跟隨市況回穩追番唔少，依家計數蝕三成左右啦，聲言要追番成平手先諗退休。絲絲仲記得，「四叔」喺○七年曾經話過，兆基財經規模最大時大約有成兩千億元。
問佢幾時追得返啦，佢好有信心咁話，「一年唔得咪兩年，兩年唔得咪三年咯」。
「四叔」呢排都係叫大家「買股唔買樓」，佢話樓價嚟緊一兩年應該有一至兩成上升空間，如果依家投資1,000萬元嘅物業，兩年後可能升到1,200萬元左右，但係如果將1,000萬元以孖展形式買重本港地產股，兩年後有機會升到3,000萬元。
恒指見三萬 年捐十億
尋日由「四叔」李兆基創辦嘅培華教育基金會為慶祝三十周年舉行酒會，四叔同絲絲講，做人「要識賺更要識使」，最好使喺慈善嗰方面。
佢仲承諾有朝一日當恒指重上三萬點，佢就會每年撥十億元用嚟資助社會，「預每人幫到一萬蚊，夾埋都幫到十萬人吖」，到時真係大家開心時佢又開心。絲絲都希望佢嘅退休大計可以快啲實現啦。
余詩韻