Market Insight：四環醫藥隨時爆升

踏入十月，港股沽空比例一直企穩在一成水平樓下，淡友無啖好食。早前升市領頭羊內銀股，有獲利回吐迹象，炒家轉向三、四、五線以至垃圾股身上打主意，總之有殺錯無放過，沉寂多時的人和商業（01387）昨日爆升13%，個名扮晒得意的蠟筆小新食品（01262）升13.4%，短期響魚缸要搵到食，幻想力及記憶力少啲都唔掂（至少要記得部分發霉股個號碼）。

睇相佬呃你十年八年，古勝老早就話中石化（00386）夥拍新奧能源（02688）向中國燃氣（00384）提親，最終運吉機會高於一切。

放大圖片

放大圖片

雙方公布擱置敵意收購計劃，昨日三隻股票股價兩跌一升，中石化「晒士」咁大，買唔買到即時影響有限，意義唔大，比武招親擂台上缺少了兩個主角，中燃股價跌也可以理解，尤其自提出3.5元收購價之後，基本上過去大半年，股價得幾日低於要約出價。

新奧難敵山頭主意

至於新奧股價不跌反升，大致解讀出兩件事，一係基金放下心頭大石，唔使再驚新奧集資，無咁大個頭戴咁大頂帽、二是交易揭示內地管道燃氣的山頭主意，新奧無辦法透過購併擴大規模，遲早畀其他大碼頭睇中，收歸己用。

復星國際（00656）捲土重來，把復星醫藥（02196）分拆上市，魚缸消息廣泛流傳，管理層與投行在定價上，因為遲遲傾唔埋，先搞到路演及招股一拖再拖。不過，近日保薦行搵到基礎投資者入大飛，先至放膽一試。

復甦故事更為可取

事實上，近日市場氣氛明顯改善，基金風險胃納回升，既然連有反彈無大升的航運股都跟住波羅的海指數炒埋，實在無理由唔睇番，早在一○年初醫藥改革時，股價經已開始調整，跌得更耐的醫藥板塊。

若然係博反彈，古勝有兩隻心水，先係搞到歐洲股神安東尼波頓，去年英名盡毀的聯邦制藥（03933）。睇中理由好簡單，一是業務幾乎肯定在一一年經歷了最黑暗的日子，逐步復甦過來，上半年製藥利潤率開始回升，業績上半年急跌45%至1.7億元，已高於一一年全年水平，市場估計今明兩年賺2.6億元及4.3億元，復甦故事可取，最重要係，當黑的股神早清倉，可以睇燈做人。

另一心水是四環醫藥（00460），公司主打藥是心腦血管處方藥安捷利、歐迪美及克林澳，上半年業績持平，賺4.61億元，主要是三隻主打藥物，銷售渠道需要時間清理積壓庫存，以及克林澳的推廣開支上升影響。

隨着公司第三季開始改變銷售模式，調高出廠價，以及庫存清理得七七八八，下半年情況應會開始好轉，一三年預期市盈率11.2倍，以一間未來兩年盈利平均增長11至13%的上市公司而言，估值合理，至少其復甦故事比起目前唔少升得火紅火綠的中資股吸引，早前股價低見2.8元之後，已見拾級回升，已重返10日、20日及50日線樓上，走勢轉佳，無乜博反彈心水嘅股友，可以留意。

保利協鑫靜極思動

歐美一直針對中國光伏業作出種種刁難，中國政府當然唔會坐視不理，置本土業界利益於不顧。昨日市場便盛傳，中央擬就光伏產業出台扶持政策，將光伏分布式發電規模比「十二五」規劃中所定嘅提高五成，嚟緊國家金融機構更會支持重點光伏企業嘅融資活動。難怪昨日光伏股有異動，龍頭股保利協鑫（03800）升逾3%，升幅算溫和，但成交超過4.5億元。走勢上，保利協鑫股價喺1.1至1.2元水平已橫行近三個月，留意交投表現，大成交衝穿1.35元有望打破悶局。

古勝