二十一世紀嘅營商環境真係要諗諗計，抱守本業遇到嘅困難同挑戰真係前所未見。銀行業作為百業之母，咪以為唔使愁，皆因依家傳統嘅經營模式已經冇乜肉食。與其對住條雞肋，中銀香港（02388）就度條新橋，運用佢喺人民幣業務上嘅優勢，結合保險，爆出一個新的觸發點。
中銀係香港人民幣交易業務嘅指定清算行，簡單嚟講全部港人存咗入銀行嘅人仔都入晒中銀袋。過往淨係賺兩地人民幣息差，無本生利，都已經貢獻咗唔少盈利。不過，隨着人行減息，呢條水似乎都收縮埋，揸住咁多人仔，如果冇出路，利息支出都幾襟計。
聽完任總於中大講完嘢之後，人民幣國際化確係為香港帶來不少離岸業務商機，人仔保單市場一哥、中銀香港旗下中銀人壽就希望將人民幣保險業務拓向再保領域。中銀人壽已經取得QFII（合格境外機構投資者）資格，正研究與海外機構合作，將佢嘅人幣保險產品複製到海外。
由海外合作夥伴銷售，佢哋收取保費後再匯到香港，由中銀人壽負責再保。通過再保方式，中銀人壽既可開拓人仔再保業務，亦可拓展人幣保險海外業務，真係一石二鳥。加上佢數之不盡嘅分行，加快咗佢業務拓展。
中銀佔盡天時，有國策支持香港發展離岸人民幣中心，令香港獨享人仔回流措施；地利，作為指定清算行，人仔業務越發達，佢嘅角色愈重要；人和，海外投資者對人民幣產品需求殷切。
香港作為國際金融市場無可取替，但人仔呢個大餅個個吼到實，Prof. J就覺得香港一定要強化做離岸人民幣中心。合縱連橫，必有可為，繼續追蹤，出發！
香港大學電子金融服務榮譽助理教授 徐燦傑