財金達人:國企女高管仍甚稀有

要做到「男女平等」,講就容易,你睇吓內地嘅統計數字,女性喺職場遇到嘅阻力就知道,以國企為例,能夠爬上高位嘅女性得幾個巴仙,所以話女性係國企管理層稀有動物,一啲都冇誇張。

喺上海同深圳有上市嘅公司入面,一○年女性喺董事會嘅比例較九七年微升0.3%,去到4%,喺CEO嘅層面,只有5.6%係女性,相比九七年嘅4.6%,已經叫做好咗。

如果淨係睇國企,個數字更低。非國企嘅董事會入面,能夠統領董事會嘅女性,只有5.4%,國企只有2.9%;以董事職位計,非國企有13.7%係女性,國企就只得10%。不過,分歧最嚴重嘅始終係CEO階層,非國企公司就由97年嘅5.1%升到10年嘅8.2%,但係國企情況就相反,竟然由九七年4.3%跌到得番3.6%。

上市港企 四成冇女董事

金占士就住呢個問題,請教過專家,佢話大多數嘅非國有企業都係家族生意,都會畀女兒擔大旗。一眾姊妹想喺國企入面發圍唔係無可能嘅,只要肯放棄會計,人力資源嗰啲比較舒適嘅後勤崗位,做啲負責幫公司搵錢嘅管理工作,話唔定可以抹去「稀有動物」呢個現象!

咁啱有份刊物就講咗香港嘅情況,原來同大陸都幾相似,喺香港嘅上市公司入面,總共有10.3%嘅董事係女性,有四成上市公司完全冇女性董事,而37%嘅公司,只有一名女董事。

金占士