近來保險公司好熱鬧，講大單嘅，就有跨地區收購活動，講local嘅，就有新產品推出市場，又有強積金「僱員自選安排」就快實施，所以絲絲近日行街，都見到佢哋喺鬧市做宣傳，上周六喺銅鑼灣就出現「三隻小豬」。
事緣BCT銀聯集團派出可愛精靈嘅「積金豬仔錢罌」，落區推廣強積金教育，除咗同大家玩遊戲送小禮物外，仲會派發「強積金小錦囊」，加深打工仔對強積金半自由行嘅認識！
另一邊廂，為咗配合早前推出嘅「AXA安盛百寶保障組合」，AXA安盛就派出麥嘜同麥兜坐住流動健康推廣車，走訪全城，旨在提升市民喺健康保障方面嘅意識，仲有個大抽獎添！
絲絲嘅老友話，啱啱喺街頭同BCT嘅豬仔錢罌影完相，轉頭就見到麥嘜同麥兜，原來佢哋係幫AXA安盛做宣傳，一次過見到「三豬相遇」，心情真係特別興奮呀！
除咗見到小豬們外，最難得嘅係一日內，既可加深對強積金嘅認知，又可以了解多啲健康保障嘅知識，真係獲益良多，呢一日都算係充實啦！