曾經有「中國巴菲特」、「法人股大王」之稱嘅劉益謙，原來已經一股不持，仲話「全世界嘅股票都可以買，就係中國嘅股票買唔過！」
話說劉益謙呢兩年預見到內地股市大勢已去，就嗱嗱聲將自己幾十億資金由股市撤去其他地方，佢接受內地媒體訪問時話：「依家連睇股票嘅欲望都無喇，將股票賣到一股都無！」佢仲話早幾日睇到有報道講，中國富豪資產大縮水，佢即刻諗起自己，但佢就投資得幾好，基本無縮水咁話！
佢之所以咁牙擦，係因為佢已轉投藝術品投資，每年豪擲幾億人仔買藝術品，單係舊年賣出齊白石嘅《松柏高立圖篆書四言聯》就賺3.5億，佢話佢嘅投資理念係「要買貴嘅藝術品」喎！
最近佢仲用6億人仔喺浦東同浦西興建兩座中國最大嘅私人美術館，仲做好每年蝕500萬人仔嘅心理準備。佢自爆除咗故宮、上海博物館及遼寧博物館之外，冇乜邊個館藏品，多得過佢。