女人對某啲事，會好堅持，原來上咗年紀嘅婆婆級，仍然心中有團火，會為自己利益堅持到底，千祈唔好諗住恰阿婆呀！喺英國搞到天翻地覆嘅「libor門」事件，就有五位年紀超過65歲嘅阿婆唔順氣畀人焗住搶錢，依家集體狀告銀行，爭取賠償。
佢哋投訴美國同歐洲最大嗰12間銀行，合謀喺按揭息率調整日，操控libor，佢哋做嘅按揭，係用libor加一個固定息率，libor升自然令佢哋要多付利息。佢哋發現，喺○○至○九年期間，通常喺每個月嘅第一日，libor都會偏高，而婆婆仲發現喺○七至○九年間，嗰幾日升咗7.5個點子，不過佢哋係點計出嚟就唔知啦，只可以話婆婆們真精明。捲入事件嘅包括美國銀行、瑞士銀行。
五個婆婆嘅代表律師，唔肯講佢哋要求幾多賠償，但係就話佢哋只係「少數受害人」，相信有同樣遭遇嘅人，有數以十萬計。條數咁大，睇嚟負責檢討libor嘅英國金融服務局（FSA）揸fit人韋奕禮，真係要(目及)實進度喇！根據美國當地嘅數據，喺○五至○九年間承做，同libor掛鈎嘅樓按，至少有90萬宗，牽涉嘅貸款達2,750億美元。
呢單係集體訴訟，喺美國好流行，如果告得入，以律師嘅估計，大把生意跟尾。不過，香港無集體訴訟，各位姊妹唔好有樣學樣，犯法o架！