Market Insight：東風後來居上

昨日港股得108點波幅悶足全日，市場缺乏消息，港股收市升11點報21,148點，即月期指21,107點低水41點，主板成交額縮減至439億元，比上周五少兩成一，好淡雙方擺出敵不動我不動姿態。聯儲局放棄通脹，將超低息期限同美國失業率掛鈎，如果美國企業外判生產持續，無法製造足夠就業職位，美元零息仲會維持幾耐，真係天曉得？

資金氾濫，近期本港樓市愈升愈有，中原城市領先指數啱啱創歷史新高，尤其新界北及細價樓升得最誇張。睇報紙見九龍灣一個400呎小單位，一年唔夠由170萬元升至270萬元，賣家即使畀SSD都在所不計，十足十股市升浪尾水，投機者由一二線轉炒四五線股，禾雀亂飛格局。

放大圖片

放大圖片

滿以為最頭痕，係未上車的無殼蝸牛，人工完全追唔上樓價升勢，儲首期變得愈來愈難，古勝早前陪賓架老友睇樓，先親身感受到即使有樓在手，個市咁升法亦同樣煩惱。

落後板塊繼續尋寶

老友一家大細，衰啲講係仔細老婆嫩，本來想接父母由外國回港同住，雖然本身擁有物業，打算由現時千呎港島單位搬大至千六七呎。第一個面對煩惱，是呎數愈大，呎價不成正比咁增加嘅問題，為額外五成居住面積，計落幾乎是手上物業雙倍價錢，考慮銀行按揭指引，大銀碼按揭收緊到得五成以下，加埋4.25%印花稅，以及預留一筆裝修費，攞唔出樓價六成真係唔使諗，意味只能賣舊迎新，先套現後入市。

然而，眼見近幾個月樓市升勢火紅火綠，老友又怕賣掉舊居，目標新居加價甚至封盤（相信唔少樓換樓業主都有類似經驗），最後陪睇生涯亦喺老友憂心最後全家瞓街底下，告一段落。

有醒目錢重新進駐

近期個市跌唔落，主因係唔少大孖沙賭十八大前，為營造良好氣氛，中央好有可能推經濟扶持措施，尋寶熱使到個別嚴重落後板塊，出現輪流炒的情況。不過，與其亂石投林，要賭真銀，古勝認為仲係選基本因素較佳的行業，汽車股是唔錯的炒落後選擇，當中又以東風集團（00489）最啱心水。

受反日浪潮影響，東風股價自五月初15.4元，跌至早前最低8.99元，跌幅達四成五，即使以年初計，股價亦累積下跌25%，相比當炒的吉利汽車（00175）及華晨（01114）同期91.1%與7.4%升幅，跑輸十幾條街。

形勢比人強，或者短期難以進行大規模促銷及宣傳活動，負面影響會在下半年浮現，不過以預期市盈率6.7倍，較行業平均9.5倍折讓29.5%，相信已充分反映下半年盈利下調的風險。博反彈首要是人棄我取，政治因素或者影響東風一時，但以過往公司的表現，可以預料在不久之後有東山再起之時，近日股價在低位見成交回升，估計醒目錢已開始重新進駐，今年六、七月兩次受制於50日線（現時在10.05元）回落，如果短期能夠升穿這度阻力，大落後的東風有條件見11至12元之間。

唔買中興亦冇蝕底

早前受到中移（00941）啟動4G設備採購消息提振嘅中興通訊（00763），突然發出盈警，預計今年首九個月將轉盈為虧，蝕16.5億至17.5億人仔。單計第三季收入下跌13%，毛利率更急跌13個百分點，主要係部分國際項目工程進度延遲及內地運營商集採模式對公司收入確認嘅綜合影響，以及期內確認較多低毛利合同所致。難怪消息拖累其股價急挫逾15%，成交逾7億元。

呢幾年揸住中興嘅基金股東習慣每年收息兼收紅股，誰不知舊年公司業績開始倒退兼停派紅股，今年仲大走樣搞到「見紅」。嚟緊單靠內地業務，頂多都係平衡下海外業務風險，整體業務難望喺短時間恢復元氣。咁多股好炒，無謂揀隻弱勢股嚟炒！

古勝