已經拖咗成年嘅強積金半自由行，終於由積金局宣布十一月一日如期實行，而金占士就知道曾經存在暗湧，其中一家大型強積金公司，其實上星期仲同積金局拗緊數，甚至發晦氣話「做唔切」添，好彩最後都講掂數。
雙方其中一個爭拗點，係涉及保證基金（Guaranteed Fund），入面列明嘅一啲細節，當中涉及「個人帳戶」若有變化，有關保證係咪仲有效，咁應該重新起計、定繼續累計呢？
據悉積金局為保障僱員利益而堅持嗰啲細節仍然有效，各大小積金公司其實都覺得冇問題，惟獨某大積金公司認為應該重新計算，仲搵咗律師團同積金局拗到底。據悉雙方在會議上各不相讓，間積金公司更話自己客戶眾多而威脅可能「做唔切」，但積金局就好強硬咁拒絕，因為十一月一日係法定，無得更改，最後間公司都妥協咗。
金占士睇番成件事，爭拗點係細眉細眼，因為保證基金好少人買，被客戶追究嘅機會亦極小，追溯問題源頭係強積金制度成立之時，根本無諗過會出現自由行，所以積金條例入面有唔清楚地方，而雷曼事件後，銀行同基金公司對所有責任條款一律巨細無遺，都係避免日後有可能被索償。
金占士