海通國際（00665）前董事總經理黃紹開係行內老行尊，積累唔少金融經驗，舊年佢開始退休，但仍心繫香港金融界，於是寫書同大家分享吓，呢本處女作最近面世喇！
前幾日佢舉行新書分享會，第一次出書嘅佢都話感觸良多，四十幾年嚟睇見愈來愈多人加入金融行業，見證住香港嘅金融發展咁話！面對依家風高浪急嘅環球市場，佢話：「隨着世界一體化，各行各業都需要創新，不斷求變，但依家環球經濟唔穩定，散戶投資時都要保守啲！」
呢本叫《香港的資本——金融業四十年風雲啟示》嘅新書，以口述形式回顧香港金融市場起伏。佢話香港人經歷咁多次大跌市，依然打不死，值得驕傲。
佢又話自己喺行內打滾多年，感受到世事無常，令佢學識面對任何事都應該以平常心處理，做到得不喜、失不悲！
除咗絲絲去佢嘅分享會撐場之外，同佢廿幾年老友，現任海通國際副行政總裁李耀榮一齊同讀者分享企業嘅成功之道。