香港嘅樓價貴到無譜，莫講話「蝸居」，愈嚟愈多人買唔起樓，做「無殼蝸牛」添，萬科董事會主席王石，就「氹」香港人開心，叫大家唔使咁顧影自憐，中國大陸嘅市民已經愈嚟愈「香港化」，同香港人一樣，住唔起大屋。
王石喺內地有「地產教父」外號，又好敢言，好多人都怕咗佢把口，依家仲出埋書，睇嚟會爆好多嘢喎！佢喺本新書入面，幫市民發聲，炮轟樓價過高。
佢話內地城市人根本冇資格住大屋！佢仲斬釘截鐵預言，城市住宅只會更香港化、東京化，即係話居住環境只會愈嚟愈差！
佢舉例，深圳每平方公里嘅人均居住面積已經細過東京，而為保糧食安全，內地唔可能再犧牲農田，變成城市，只能高空發展，將啲樓愈起愈高，到時增加埋人口密度，城市望落去就愈似香港同東京喇！最慘嘅係，高空建築成本比較高，到時屋只會愈賣愈貴，居民就愈住愈細。
內地樓市出問題唔係新鮮事，想要個安樂窩真係咁難？王石就拎番萬通董事長馮侖嘅言論幽咗一默。馮侖話北京OL中女嫁唔出，將成副身家拎去買屋，係拉高北京樓價主因，王石就提議實行「一夫多妻」，先係解決房屋問題嘅良策！
余詩韻