孖妹S檔案：家訪財俊講地產股
「只係想要一間好普通、好普通嘅樓。點解佢哋（市民）要用成世人嘅時間去供一層樓呀？」孖妹猶記得呢句十多年前出自三色電視台的經典劇集對白，時至今日仍可反映出不少「樓奴」的心聲。面對樓價飆升，孖妹欲哭無淚，但望向一眾地產股表現，又似是希望滿載，其中新世界（00017）更於年內上升逾一倍，升幅冠絕一眾港股！
港人於樓市摸頂，卻於股市尋底。美國QE3（第三輪量化寬鬆措施）出台後，樓價升完再升，而地產股亦乘勢而起，大幅跑贏恒指！究竟依家炒樓定炒地產股着數呀？今期孖妹搵嚟兩位金融界業主，睇吓佢哋個安樂窩之餘，再睇吓邊隻地產股可以跟隨樓價拾級而上！
李：敦沛證券副總裁李偉傑（Jason）
彩兒：我見你屋企四四方方，並且不設窗台，都幾實用呀！
李：我買嘅單位有兩房兩廳，我們一家三口瞓喺同一間房，另一間房就係雜物房加貓竇，單位實用面積逾八成！其實恒隆地產（00101）不乏高質樓盤，正如淘大這個屋苑配備齊全。公司今年業績理想，惟股價卻跑輸同業，加上暫未有大型樓盤推出，故股價大漲空間不多。
彩兒：淘大花園的單位實用性高，加上商場、食肆應有盡有，所以其交投量一向活躍，轉手或放租都冇難度！
李：係呀，九龍灣的交通配套完善方便，所以呢區的租金回報約有四厘，就好似我個單位的租金水平約12,000元，都挺不錯！其實我有睇緊同區物業，諗住再買樓出租o架，之但係樓市實在升得太快喇，七月至今短短數月又升咗近兩成，所以我想等個樓價回落些少先入市！
彩兒：現時樓價咁貴，學四叔話齋，買股好過買樓啦！
李：無他嘅，現在樓價處於高峰，相反股價處中低水平，不少地產股仍未隨樓價飆升，可續享資產價值折讓收窄的好處，且股市套現能力較高，前景可看高一線！
儘管現時地產股的走勢仍落後於樓價發展，但美國聯儲局於上月放水，進一步推升資產價格，將可持續利好地產股表現，另外內地經濟顯著放緩，不少民企相繼出現問題，促使穩健的藍籌股備受追捧。雖然政府有機會再推壓抑樓價的政策，或會對地產股構成壓力，但股民不妨在股價回吐時趁機吸納，料可率先跟隨大市反彈！
彩兒：咁你睇好邊隻地產股？
李：投資者可留意長實（00001）同新世界。長實是過去五年賣盤最多的發展商，加上今年將軍澳「峻瀅」銷情理想，明年初亦有「日出康城」第三期等項目，股價前景可看高一線，今年可上望130元（上周五收報115.7元）。另新世界將可受惠積極銷售物業單位，全年賣樓收入料創新高，即使今年股價已大升104%，料年底前可進一步升至14元（上周五收報12.78元）。
傅：康宏金融副總監傅惠賢（Zuriel）
高妹：首先要恭喜你新居入伙，你間屋設計得好有心思呀！
傅：多謝呀！呢個係我同太太的idea，我哋鍾意親身去揀選傢俬同布置家居！我們有過一輪磋商，就好似囝囝同囡囡應該同房定分房呢個問題，我哋都諗咗好耐，最後決定畀兩姊弟同房培養感情，所以我哋打通兩間睡房，而主人房亦相連另一間細房，所以依家屋企個間隔係兩房兩廳（本身係四房兩廳），另加工人房！
高妹：上年有不少樓盤推出，為何最終會選擇名城？
傅：由於買樓時考慮價錢、地點等多個因素，而長實樓盤的地點及定位均不錯，故最終決定買入名城單位！
高妹：樓價升得咁犀利，驃叔（已故演員董驃）曾於廿年前的電影內說過「有屋冇人住，有人冇屋住」，估唔到依家仍然適用！
傅：現在樓市處於失衡狀態，供不應求的情況仍然持續。我於○○年首次喺粉嶺置業，當時以為樓價經已跌定，點知卻未見底，所以我都曾經做過負資產，最後喺○五年蝕咗五十萬賣出該單位！不過，現時嘅市況就剛剛相反，因為香港的經濟條件良好，加上低息環境持續至二○一五年，搞到人人都爭住買樓投資，並推高磚頭價格囉，所以我去年賣出何文田的單位時，帳面都賺咗二、三百萬o架！
高妹：嘩，可惜我哋冇錢買樓！咁你喺股市有冇斬獲？
傅：今年地產股的命途不錯，我早前在新地開始出現官司問題時，約於90元價位買入該股份，現時已升逾20%啦！雖然新地的管理危機仍存，但其盈利能力向來理想，加上新盤銷售成績甚好，所以我未諗住賣出獲利，料今年底前可進一步升至120元（上周五收報112.50元）。
家居設計小發現
Jason的家庭成員眾多，總共有六口，除了他與太太及囝囝外，仲有三隻貓咪。他稱，貓咪曾經奪窗而逃，好彩只是虛驚一場，後來在樓下數層的平台尋回，所以他立刻裝上防貓跳樓窗花。此外，這位愛貓之人的家中亦滿布以貓為主題的裝飾，令到這個細緻小巧的蝸居洋溢着溫情！
家居設計小發現
Zuriel對子女寵愛有加，從他的家居布置便可見一斑，尤其是一對小朋友的睡房，就恍如置身一個兒童王國！雖則該張貼滿米奇老鼠的兒童床的壽命短暫，約在小朋友八歲時便需退役，但Zuriel這位慈父卻並不介意，並表示要活在當下，「數年過後，或許一對仔女已不喜歡米奇老鼠呢！」
（高妹）、（彩兒）
若有料報畀高妹同彩兒或有嘢問，可電郵money.biz@opg.com.hk