Market Insight：安踏體育吼位短炒
美國總統奧巴馬看來運氣唔差，雖然上星期第一場選舉辯論，民意先輸一比零，但剛公布的美國九月份就業數據，非農就業職位增加11.4萬份，失業率更由八月的8.1%回落到7.8%。迷信友話，以往總統選舉前凡失業率高於8%，尋求連任者必敗！
周末所見，管理學大師Jack Welch和一眾共和黨支持者及陰謀論評論員，出力批評白宮造假，冀力挽狂瀾。客觀而言，就業數據改善，顯然並唔係因為美國新職位增長，而係長期失業人士退出就業人口所致，但俗語有云成王敗寇，或者真係個天都唔畀奧巴馬加入卡特及老布殊嘅「一任總統俱樂部」。
奧巴馬量寬牌有效
四年前奧巴馬嘅競選口號：「Change」，就目前美國經濟及疲弱就業情況而言，的確唔多對辦，但講句公道話，次按風暴的出現，唔少乃係小布殊留低的蘇州屎造成，在美國財赤屢破紀錄，巧婦難為無米炊，怪唔晒奧巴馬。尤其當雷曼倒下，全世界話美國難以逃避再出現一次一九二九年式的世紀經濟衰退。
咪同航運股談戀愛
但奧巴馬及美聯儲局主席伯南克狂出量寬牌，未到任期尾聲，樓市已初見起色，新屋動工量及樓價在上半年有觸底迹象，道指較奧巴馬上任時的8,077點，更累升六成九，心想選前四星期，若非出現極為意想不到之事，奧巴馬續掌白宮的機會在八成以上，與其擔心美國變天，古勝更有興趣，到底十一月的十八大之後，中國可以出甚麼措施救經濟。
港股連升五日，上周五恒指升104點，報21,012點，乃五個月以來首次重返兩萬一樓上收市。薄熙來被雙開，十八大終於定到召開日期，唔少人憧憬A股八日假期之後，今日復市開高。不過唔好話筆者有心潑冷水，只係唔想大家希望愈大，失望愈大。觀乎上星期三日市，恒指累積升172點，平均一日唔夠六十點，有心無力情況明顯，兩隻非中資股份，滙控（00005）及友邦（01299）已經分別貢獻61點及35點，佔指數升幅五成六，其他中資股無預先炒高，個人估計今日A股能否升住收市，機會只係五五波。
波羅的海指數近期由低位勁彈三成五，去到875點，刺激一眾航運股大反彈，中國遠洋（01919）、中海集運（02866）、中海發展（01138）、太平洋航運（02343）升幅介乎4.6至5.2%。但周末同一個海運公司高層傾開，佢話最近唔少新船落水，供應量大增之下，運費只係止跌，未見反彈，歐洲航線唔少更係連半滿都講唔上，船東都嗌緊救命。
根據股神科斯托蘭尼的溜狗理論，話實體經濟同股市嘅關係，就同主人與狗一樣，不論狗向前向後跑得多遠，最後都回到主人身邊，大家朝着一個方向。航運股目前平均市帳率0.5至0.6倍，已反映一兩年內股份業績見紅的事實，或者有一炒的條件，但博反彈最好緊記千祈唔好同佢談戀愛，始終反映運費的波羅的海指數勁彈之後，仲只係去年底的四成左右。
自由現金流見改善
醜股大翻身的仲有體育用品股，自上月底瑞銀報告唱好後，未停過飆升。值得一提，安踏（02020）及李寧（02331）兩隻股係基金掃貨主力，上星期升勢持續，成交卻不升反跌，如果今個星期唔見新錢掃貨，短期回吐壓力應該唔細。
由高庫存開始消化的角度睇，體育用品股最壞時候應已成過去，不過揀股應先考慮滲透率高、資產負債表較佳者，心水依然是安踏。上半年安踏的庫存日數上升至50日，不過自由現金流見改善，減長短債後淨現金近25億人仔，為高息政策的維持提供保障，缺點是兩星期內由5.05元炒上6.5元，升勢有過急之嫌。若回到5.7至6元之間，捧場客可重新考慮。
古勝