收購合併係商場上常見嘅擴張策略，而近年此類商業行為在中國亦甚為普遍。除了係因為內地經濟急速增長外，亦受中國當局積極鼓勵所致。就好似通天酒業（00389）剛剛就完成了一項收購交易，對象係具五十幾年歷史嘅烟台白洋河。
收購交易嘅促成都係因為「1+1大於2」，能夠產生協同效應。通天指收購交易完成後，集團可擴闊產品組合、達致規模經濟效益、擴展集團之分銷網絡等等。如果只係得呢幾項協同效應，Prof. J就認為有啲「行貨」喇。但細心研究下，原來「驚喜」在細節，通天嘅醉翁之意應該係烟台白洋河嘅生產基地。
烟台白洋河嘅生產基地坐落於中國釀製葡萄酒嘅黃金產區，是亞洲唯一嘅「國際葡萄‧葡萄酒城」，與世界著名嘅葡萄酒產區法國波爾多位於同一緯度。通天嘅本業係葡萄酒生產商，釀製優質葡萄酒要有適合嘅土壤同氣候。如果能擁有與波爾多一樣優質嘅條件，再配合優秀嘅釀酒師及技術，這無疑將成為通天嘅一大優勢，才是真正壯大集團實力。
過去幾年，內地葡萄酒行業增長迅速，「十二五」規劃亦提到葡萄酒市場仍有很大增長空間。但因為東、西方嘅飲酒文化存在本質上嘅差異：中國人素喜豪飲，飲的是豪情；西方人則着重細味，品的是情懷。葡萄酒嘅普及程度未必會同西方睇齊。不過，隨着內地中產收入增長，加上得到政策支持，葡萄酒市場仍然值得繼續追蹤。
香港大學電子金融服務榮譽助理教授 徐燦傑