中日釣魚島爭端升級，前兩日先傳出農行（01288）、交行（03328）等幾間中資大銀行會集體杯葛下個禮拜喺東京舉行嘅世界銀行同國際貨幣基金組織（IMF）年會，不過，國際金融研究所（IIF）就證實，人行行長周小川仍然會喺下周五東京IIF年會上發表主題演講，令大家對中國官方嘅態度「抓爆頭」。
中資銀行集體缺席日本半個世紀以來，首次舉辦嘅國基會同世銀年會，畀啲西方媒體形容係「將劍拔弩張嘅中日摩擦，搬到國際舞台上表演」，仲被視為兩國分歧開始向經濟領域蔓延嘅象徵，點知轉過頭就傳出周小川仲會繼續出席東京IIF年會，連人行副行長易綱，都會參加年會上面一個關於全球經濟展望同風險嘅討論。
日本財務省財務官中尾武彥尋日話，冇聽過中、韓政府官員要取消行程嘅消息，認為佢哋仍會參加IMF同世銀年會。而IMF發言人就話，知道有啲原定出席嘅人員日程安排有變。究竟中資銀行嘅集體杯葛，係咪只代表「民間態度」，要到下個禮拜先可以揭曉喇。