思捷（00330）新人上場，得到唔少券商睇好，而摩通更加係撐到出晒面添！出報告點名指出對新CEO有好印象，尋日思捷股價就一枝獨秀，全日升足6%有多，罕有地跑贏咗大市。
早喺八月，思捷請咗ZARA前高層馬浩思做CEO，市場都有好大期望，憧憬呢位新CEO可以打救垂死嘅思捷，個股價仲好似打咗興奮劑咁，由10蚊左右炒到上差唔多14蚊。
馬浩思上星期三正式登位，雖然只係得個幾禮拜，仲未有機會顯示實力，但佢見完班賓架，發表鴻圖大計之後，摩通就話覺得佢有清晰嘅發展戰略，知道思捷衰喺邊，會透過提供合適產品畀目標客戶群嚟整頓零售業務，仲會講速度、講效率、拎啱貨。假以時日重奪客戶歡心喎！
摩通相信，新嘅戰略計劃將會令思捷步向成為「快速時裝」品牌，不過喺縮短交貨時間都仲係有障礙，坦言改造計劃要修改，因為依家係由供應鏈行先。但對於可唔可以令思捷浴火重生，摩通覺得依家都仲係言之尚早。絲絲都希望今次思捷可以起死回生，咁買靚衫又多一個選擇啦！