全球知名公司嘅CEO排行榜不外乎都以賺錢能力、專業或者聰明才智做標準，睇到絲絲都有啲悶；不過《Business Insider》今次就破格地用外表、生活態度、時裝品味等等嚟評價各位CEO，並且公布咗「50位性感CEO」排行榜。
位列榜首嘅係Change.org嘅創辦人Ben Rattray，佢嘅網站自○七年創立後，一直透過網上聯署請願推動社會改變。佢曾被美國媒體選為硅谷九大鑽石單身漢之一，以及去年被《時代雜誌》選為全球最具影響力嘅100人之列。
如今佢嘅網站已經開始賺錢，加上Rattray崇尚簡樸嘅生活態度，揸嘅車都只係平價嘅日本豐田車款，家陣再被選為「最性感CEO」可謂當之無愧。
而網上付費平台Square嘅創辦人，兼Twitter共同創辦人杜斯（Jack Dorsey）就排第三位；○九年創立嘅Square，預計今年一共處理逾80億美元嘅交易金額，分分鐘令杜斯成為「流動錢包」市場嘅新星。
除咗俊男，當然亦唔少得一班美女CEO啦！好似內衣品牌Journelle嘅CEO錢伯斯（Claire Chambers）排第十三位，佢仲話要將時裝元素同自家嘅內衣融合。
至於喺今年七月上任嘅雅虎CEO邁耶（Marissa Mayer），就排喺第二十一位，啱啱生完小朋友嘅佢，連產假都唔放，話想盡快復工繼續搏殺喎。
呢班CEO個個都係又叻又靚嘅俊男美女，公司有佢哋坐鎮，就真係公司嘅福氣啊！
余詩韻