Market Insight：維達國際重展升浪

事實上，若非多得滙控（00005）股價昨創十四個月新高撐住，一隻股票為恒指貢獻56點，實質恒指經已見紅，尤其強勢好一段時間的地產及收租股有轉勢迹象，隱約聞到大孖沙托住重磅指數股減磅味道，加埋沽空佔比跌至8.44%的六個交易日最低水平，好友想挾上去突破21,000點的難度大增也。

常言道歷史不停重演，但信到十足就會變成迷信，八七年及九七年兩次大型股災，分別在十月份發生，未到萬聖節迷信友又再群起藉「股災月」四出嚇鬼，由歐洲OMT及聯儲局推QE3之後，歐美股市呆呆滯滯，商品中油價更出現反高潮，由100美元隊到88美元樓下，央行放水威力一次細過一次係事實，但唔代表股市又要大插插，尤其中港股市，今日估值同「高」字絕緣，可跌空間相信也不及八七、九七及○七年高位時。

放大圖片

放大圖片

十月料牛皮居多

睇番過去五年，港股十月份成績其實係三升兩跌，○七至一一年分別跌0.5%、升4.4%、跌22.4%、升3.3%及12.9%，硬要瞎猜，古勝估係牛皮悶局機會高，要等十一月中國十八大召開，以及美國總統選舉塵埃落定，股市才有瞄頭。

央行推量寬，目的清楚不過，是希望刺激投資推動經濟復甦，可是九月中旬開始的怪現象，完全無基金經理大規模risk on掃貨，反而美長債息由1.9厘碌番去1.6厘。昨日西班牙拍債，雖然是年期超越三年短債OMT入貨範圍，傍晚結果所見，反應一樣唔錯，熱錢唔揀去實體經濟，泊晒爭取定息回報，歐美央行大員真係相當頭痕。

渣打不妨分注買

由於愈低息加埋磚頭通脹夾擊，兩隻心水REITs─—領匯（00823）及置富產業（00778）昨分別收報37.2元及6.03元，創收市新高，唯獨注入廣州IFC後，上周以每股3.3元批股的越秀房託（00405），插低5%收報3.59元。早前已提過，批股以T+5形式結算，理論接貨者下周一先收到貨，看來部分人昨日已經率先偷步食胡，以批股價同昨日收市價比較，仲有8.7%利潤，接貨者今次都夠肥仔。

近期另一個最受私人銀行客仔歡迎的產品，非要數銀行所發的永續債券（Perpetual Bond）莫屬，薄仔零息，有5至7厘回報頂住一吓通脹確係無可厚非。不過，近期債價都升得有啲誇張，就好似近期緋聞纏身，先被美國紐約州調查，再傳被淡馬錫試盤減持的渣打集團（02888），目前股價比八月初出事時，低約半成，反而渣打發行的Perpetual Bond早已升穿兩件事件發生前高位。

唔單止股弱債強，渣打今年累計升4.6%，比滙控同期25.2%升幅，落後幾條街，以一三年3.9厘回報，9.7倍PE，如果有揸滙控，不妨諗諗換貨買些少渣打，怕淡馬錫真係沽貨的話，可以考慮分兩注入市，現水平先買一半，假如真係折讓減持，攞到就攞，攞唔到喺街掃。

已具備炒作理由

市況雖靜，部分二三線股卻各自各精彩，高beta股好似尋寶一樣，昨日發威的紙品股，炒到飛起。簡言之，高財務槓桿，受惠於人行未來半年的一至兩次減息，加埋原材料木漿價格下降，已經夠晒理由炒佢，奇怪是紙品股炒到出煙，基本條件接近的廁紙股卻相形見絀，恒安（01044）估值貴人人都知，一三年唔夠14倍PE的維達（03331），上周股價先隊穿10元，近兩日走勢先好番些少。

瑞信昨日出報告畀佢跑贏大市評級，睇13.5元，理由係一二至一五年，估計銷售及盈利複合年增長可達26.5%及30%，理由是市佔率上升、及產品組合改善等因素，維達昨收報10.82元，剛好升至10日線水平，如走勢突破，短期有條件升上12元樓上，鍾意跑短的人士不妨留意。

古勝