平保（02318）、騰訊（00700）同阿里巴巴，早前話會一齊搞網上金融業務，係結合銷售同埋保險賠償服務嘅突破，除咗用家覺得方便之外，講到最高興嘅，就梗係上海市政府，皆因上海可以「獨攬」收益。
呢間新公司最大創新之處，係佢除咗註冊地上海之外，喺全國冇其他分支機構，完全靠互聯網進行銷售同賠償服務。
聽講間公司嘅創新銷售方式，唔單止受到中保監嘅支持，而且仲得到上海市政府嘅高度讚賞。事關間公司喺全國不設分支機構，所有保費收入都會留喺上海，一年貢獻嘅稅收都咪話唔吸引，聽聞為咗令到間公司順利獲批，上海市官員仲專門同相關監管部門溝通過添。
不過，中保監依家並冇針對虛擬財產保險嘅監管制度，新公司所有業務都通過互聯網進行，可能唔止要中保監審批，或者仲要涉及工信部、甚至人行等部門嘅批核，睇怕未必趕得及今年內幫上海市財政創收入喇。
內地媒體尋日又爆料，話由平保、騰訊、阿里合組嘅公司，叫眾安在線財產保險，註冊資本金10億人仔，阿里係最大股東，揸住近兩成股權，平保同騰訊各揸15%，其他股權就分散喺幾間網絡公司手上。