QE3推出以嚟，股市、黃金同樓市好似食咗興奮劑，樓下藥房老闆，上個星期仲叫絲絲買多啲廁紙，唔係話怕畀自由行買起晒，佢好有邏輯咁分析話QE3會令紙漿起價，遲吓啲廁紙都會貴啲，絲絲信鬼晒佢，買咗五條呀！
點知尋日里昂出咗個「廁紙股」報告，話「QE3等於紙漿價格上升」完全係謬誤，絲絲真係要搵個藥房老細尋仇呀！
里昂份報告以「惡魔在細節」為題，拆散晒啲謬誤。佢哋嘅分析發現QE1推出時，紙漿價格的確升咗36%，但發現升得咁緊要最主要都係美元弱勢。而去到QE2，國際短纖維紙漿嘅價格喺美元層面係冇升跌，反而又係因為美元又再貶值先至令當地紙漿價上升。所以里昂就好有理由咁認為，喺紙漿供應增加之下，「QE3等於紙漿價格上升」呢個講法唔會成立喇！
此外，最近有傳內地廁紙股出現價格戰，令恒安（01044）同維達（03331）兩隻「廁紙大佬」股價近日有啲回落。里昂話市場對消息反應過度，仲逐一反駁「供應上升等於價格戰、打折等於價格戰」等。講到要揀，里昂就like維達多啲，因為估佢喺未來12個月潛在絕對回報更大喎！