絲絲講場：恒生便服日鬥Sporty
恒生銀行（00011）副董事長兼行政總裁李慧敏（Rose）上咗任幾個月，絲絲見親佢，都係着深色衫，最常見係黑色，尋日係便服日，難得着得好casual，運動衫褲示人，耳目一新，除咗Rose之外，同佢差唔多裝束嘅，仲有一大班高層添。
激勵新一代拚搏
喺過往幾屆奧運會之中，香港運動員分別喺滑浪風帆、乒乓波、單車項目摘取金、銀、銅牌，幾名恒生高層都用呢幾個本地精英體育項目嘅造型登場，輕裝上陣，同時表達佢哋對本地體壇嘅支持。
Rose就揀咗乒乓波板擺pose，呢個超大碼波板，望落幾搞笑，Rose同一樣揸乒乓波板嘅恒生中國副董事長兼行長薛關燕萍，好似打雙打咁。咁邊個扮演「牛下車神」單車手李慧詩呢？原來係恒生執董馮孝忠。Rose話，佢哋呢身打扮，唔單只係身體力行支持便服日，更加係想用運動員嘅拚搏精神，鼓勵新一代以積極態度，喺工作上全力以赴，努力進取。