恒隆地產（00101）呢幾年都喺內地大城市搞商場，尋日喺瀋陽嘅第二個項目出世喇，絲絲見佢哋依然走高檔路線。董事長陳啟宗講嘢一向犀利，講起新BABY出世，梗係讚不絕口啦，仲將旗下物業比喻為內地靚女明星范冰冰，佢話「如果我係范冰冰，會擔心無男朋友咩？」言下之意，係靚女唔憂冇裙下之臣，佢哋嘅商場唔憂冇人租，仲話老百姓嘅眼睛係雪亮，知道咩嘢係好嘢！
香港樓市「慶合合」，政府手、口兼備，出招壓樓市，個個月都推好多地，但恒隆出手嘅次數又唔係好多喎，係咪顧住投資大陸，唔玩香港呀？佢話：「唔係，只係驚做嗰時（出手買地），大家唔開心，俗啲講句，（樓價）冧到阿媽都唔認得，你話開唔開心吖？」
咁又係，睇番恒隆以往嘅「出手」紀錄，又真係好似佢咁形容。近期政府同埋兩鐵住宅地招標，佢哋淨係入過一次標，爭過被喻為「市區最後一幅海景住宅地皮」嘅前北角邨靚地，另一單矚目嘅舉措，係沽咗麗港城商場。不過，佢話依家個市冇咁易冧喎，由佢把口講，大家會唔會安心啲呢？
依家香港樓巿升到癲，好多人話只要整多啲供應就搞得掂，陳啟宗話，樓價高唔係完全因為供應問題，過去7至8年都無畀地，息口低啲人梗係買磚頭保值。至於近日新界東北發展爭議，佢就話香港人自己決定，「又嫌地唔夠，要起嗰時又唔畀起，自己諗啦！」
余詩韻