對沖基金經理和傳統長倉基金經理主要不同之處，應該是對看法並非太執着，反而更睇重值博率。睇中一個大浪，只需和市場搏鬥數以百計回合，拉勻有得贏。
跟開本欄的朋友會知近幾日自己偏向睇淡，原以為結算日會是淡友總攻擊的吉時，現早了一天當然無任歡迎，但有一個固定立場，卻仍然要且戰且走，昨日下半場便做了兩手準備，倒頭買入少許末日Call，變成買齊末日Call Put大包圍。
一向原則是賭本應慳則慳，不浪費無謂注碼，買末日Call不是純粹貪平，而是看來有一定牌面。期指續險守20,500點，最重要是再次狂掃本地地產股，個別股份勢如破竹，怎會是大淡市氣氛，頗大機會是延續近期不上不落，個別發展局面。
雖然關鍵支持位極近，一旦失守跌勢可能加速，但風險可以用工具管理，買今日到期的末日股票Call，有效槓桿比率幾十倍，只要股票升一兩個百分點，注碼便可變倍。睇錯亦無所謂，不外輸光投入注碼，何況一早持有末日Put已作包抄。
絕對不必要亦不需要死牛一面頸，日前睇淡，根本不知地產股有力破頂，因應新的證據稍作調節是十分正常，愈大個ego只會死得愈快，肯蝕章利用工具包抄，總之以值博率為依歸見機行事。短炒之難，難在市場愈來愈快，但搖風擺柳又不是辦法，學會用工具調節賠率是十分重要，減低出錯時成本，才夠膽快跟市場步速。
‧觀望結算
豐盛金融資產管理董事 黃國英（作者為註冊持牌人士）