絲絲講場：馮婉眉陪員工玩盡迪士尼
中秋佳節，點都要同家人一齊過，絲絲聽聞滙豐今年送厚禮畀員工，上星期去咗Disney包場，有近萬名員工同家屬一齊參與，差啲逼爆成個主題公園，絲絲仲見到滙豐香港區總裁馮婉眉（Anita）滿場飛，同員工一齊玩、一齊影相添！
聽老友講，如果員工揀咗去Disney，就會得到4張入場券，講到玩，絲絲又點會執輸？所以上星期日就跟朋友去大玩特玩，除咗慶中秋，仲提早過「哈囉喂」添！雖然話主題公園布置得好詭異，不過，能夠同家人、朋友一齊度過開心嘅時刻，真係特別warm！
滙豐包場同員工慶中秋
絲絲仲見到Anita一身輕裝，喺主題公園裏面滿場飛，仲捉住啲員工一齊影相留念，真係開心到飛起！Anita同絲絲講，除咗包場請員工去Disney，其實員工仲可以選擇享受一套電影，或者去西九Wine & Dine Festival品吓酒，三選一，各取所需！
其實滙豐有大約一萬個員工，雖然唔係送cash，但係咁有心思為員工安排Family day，呢份心意真係唔話得！