海嘯捱義氣留任顧問
正所謂飲水思源，Andrew當然明白呢個道理，所以佢喺瑞銀一做就八年，由○○年做到○八年八月先至離開，在職期間仲帶領瑞銀香港分析團隊，連續五年（○一至○五年度）畀《機構投資者》雜誌選為亞太區最佳分析團隊，連佢都話：「我淨係做過一間投行！」
但Andrew表示：「○八年我覺得事業需要變化，亦覺得係時候創業，故決定離開瑞銀；但當年正值金融海嘯，有人話我揀呢個時候走人，係反骨仔行為，於是我留低做瑞銀外部顧問，一做又四年，真係咩恩都報晒，所以今年決定唔再續約，留番多啲時間，等自己可以出去搵客。」絲絲明白嘅，力不到不為財，做老闆梗係要事事親力親為喇！