銀行業競爭激烈，工作壓力又大，真係少啲精神同體力都唔掂。
為咗鼓勵員工勤做運動，保持身心健康，花旗集團首次為全球員工搞咗個「Live Well at Citi」運動，提升員工嘅健康意識。
高層親身冒雨領跑
為咗身體力行，花旗亞太區行政總裁卓曦文尋日喺港島寶雲道跑咗四公里，為呢項運動喺亞太區嘅推行揭開序幕。雖然尋日天氣時好時壞，有時仲落起滂沱大雨，但好在天公作美，呢項活動總算可以順利完成。
改善體質兼做善事
員工勤做運動，除咗可以改善體質之餘，仲可以賺取積分；花旗會將積分轉為善款，再捐畀國際仁人家園、紅十字會、紅新月會國際聯合會呢三個慈善機構，一舉幾得。
花旗又宣布，全球頭３萬個報名參加「體能挑戰計劃」嘅員工，仲可以獲得一個健身包，裏面有運動袋、水樽、鎖匙扣、跳繩同計步器，方便員工量度自己嘅健體進展，相當有心思。